Veldeke Limburg op website en Facebook
Veldeke is neet allein technisch bezeg um zien communicatie te verbetere (digitalisere en zoe) meh ouch inhawdelek. Op euze website, dee sinds fibberwarie vaan dit jaor daoneg vernuid is, doen veer eus bès alle actualiteite vaan eus vereineging touwgaankelek te make. De leste drei nuitsberiechte vint geer medein op de thoes-pagina vaan de website www.veldeke.net in de rechterkolom. Awwer beriechte krijg geer te zien door op de balk “Nuuts” te klikke dee bove die drei mies recente beriechte steit. Es geer op Agenda in ’t menu bovenaon de pagina klik, krijg geer ’n euverziech te zien vaan van alles wat binne Veldeke aon eveneminte geit plaotsvinde de koumenden tied. ’t Is dus de meujte weerd um zoe noe en daan ins euze website te bezeuke um te kieke of dao get steit wat veur uuch intrèssant kin zien.
En es uuch dat te väöl meujte is: Veldeke Limburg heet ouch ‘ne Facebook pagina en dao-op plaotse veer ouch zoe väöl meugelek nuitsberiechte, neet allein vaan Veldeke Limburg of vaan de lokaal kring meh ouch es dao get nuits steit in de media, de gezèt of de regionalen tèllevisie en radio wat te make heet mèt eus Limburgse taol of cultuur. Dus es geer op de huugte wèlt blieve vaan wat ziech aofspäölt op dat gebeed, “like” daan de Facebook pagina vaan Veldeke Limburg en daan krijg geer vaanzelf alle nuits thoes bezörg. En es geer touwvalleg ouch op Twitter zit, ouch dao weurde de nuitsberiechte vaan Veldeke ummertouw gedeild. Genóg meugelekhede dus um uuch te informere euver boe Veldeke mèt bezeg is!
Lokaal kring
Dat betröf neet inkel de activiteite vaan ’t provinciaol bestuur of vaan de provinciaol commissie volkscultuur, meh ouch de activiteite vaan de lokaal kring. Op die meneer hope veer tot die lokaal activiteite breier aondach kriege en neet beperk blieve tot de umgeving en de lede vaan dee krink. Es ‘ne krink get organiseert wie ‘nen dialekaovend mèt veurdrachte en meziek, zouw ’t bès kinne zien tot ouch lede vaan ander kring dao nao touw wèlle goon. ’t Is daan aon de krink um te bepaole of neet-lede vaan hunne krink daoveur get extra’s mote betaole.