Veldeke Mestreech maak Vastelaovends ABC

Blaore, hiering en insjete. Wäörd die edere vastelaovendsvierder zeker geit gebruke de koumende weke. Veldeke Mestreech maakde veur de gelegeheid ´n alfabet mèt wäörd die oonlosmakelek aon dit volksfies verboonde zien. Mèt e knikuigske weurt zoe aondach gevesteg op de riekdom vaan de taol en de verboondenheid die ze heet mèt wat in de stad gebäört.

‘t Vastelaovends ABC is gratis te downloade (en te printe) op de website vaan de Krink Mestreech of via hunne Facebookpagina.

Veur ‘t Mestreechs

Veldeke Mestreech heet es ideaol tot ‘t Mestreechs blijf leve es ’n eigetijds modern taol. Gesproke en gesjreve, door joonk en aajd mèt aondach veur spelling, stijl en grammatica. Daorum zètte de stiechting en häör vrijwèllegers ziech mèt väöl leefde in um lui te enthousiasmere um Mestreechs te goon en blieve spreke en sjrieve. Dat deit Veldeke Mestreech oonder mie door oondersteuning te beeje bij ’t vertaole of controlere vaan tekste, eveneminte te organisere zoewie ’t Groet Mestreechs Dictee en de Keersemespeurtoch en ’t oetbringe vaan eige produkte zoewie ’t Leesplenkske vaan de Mestreechter taol en versjèllende beuk.