Veldeke Oeuvre-Pries veur Ton Engels

Kroeën op ’t werk veur de leedjesmaker oet Panningen.

Ton Engels is dit jaor de óntvanger van de Veldeke Oeuvrepries van ’t Limburgs Leed. Veldeke Venlo-veurzitter Henk Buskes makde dit in ’t L1-radioprogramma Plat-eweg van Henk Hover bekind. De oet Panningen aafkómmende leedjesmaker wuurt daomei ge-ierd veur zien groeët oeuvre. Normaal wuurt de pries tiedes de Nach van ’t Limburgse Leed oetgereik, umdet ’t evenement door de coronasituatie neet doorging, vónd de oetreiking plaats in de oetzending van Henk Hover.

Motivatie Dialekvereiniging Veldeke Venlo

Veurzitter Henk Buskes: “Ton mak ós al mier dan viefentwintig jaor moeëje dialekmeziek. Hae haolt ’t ónderste van zien kunne deep oet zien zeel. In al zien puurheid is hae eine bevlaoge zenger en leedjesschriever. Ton Engels haet zien nummers in hiel Limburg en ouk vaer dao boete oetgedrage. Hae huurt wies de allerbeste singer-songwriters dae ós provincie aan te beje haet. De poëtische krach van zien leedjes, gecombineerd mit zien geweldige gitaarspel mak Ton wies eine arties van de baoveste plank. Op professionele wies zet hae zich al jaore in um idderein kinnis te laote make mit zien leefde veur Limburg, door middel van zien leedjes en optraejes. Hae is eine echte ambassadeur van ózze Limburgse cultuur en ós leedjes.”

De Veldeke Oeuvre-Pries van ’t Limburgse Leed

Veur de vieftiende kier guuef Dialekvereiniging Veldeke Venlo de Oeuvre-Pries oet. Det dit in andere jaore altied tiedes de Nach van ’t Limburgse Leed gebeurt ónderstreep de bizóndere samewerking det d’r tösse de vereiniging en ’t festival is. De pries geit idder jaor nao eine persoeën of groep mit jaorelange verdeenste veur de Limburgse dialekmeziek in en boete de provincie. De winnaer krieg ein kunswerk gemak door Mariëlle Franssen en ein oeërkonde.

Ton Engels

Ton Engels (1952) oet Panningen haet al ein rieke, jaorelange muzikale loupbaan achter de rök as hae in 1994 euver geit nao dialekmeziek. Wies daen tied zingk en schrief Ton in ’t Ingels: mit ziene groep Blowbeat toert hae jaore in ’t binne- en boeteland. As hae ontdek det ’t schrieve van leedjes in ’t dialek um good aafgeit bouwt Ton ein twieëde carrière as dialek- arties op. In 1995 verschiend zien album Plat, gevolg door nog vief cd’s in de taal van zien dörp. In 2000 is Ton de ierste winnaer van de pries van ’t Limburgse Leed, de aanmoedigingspries van de Nach van ’t Limburgse Leed,  dae later woort umgeduip wies de Jo Erens-pries. Ton Engels schrief ein groeët dialek-oeuvre beejein en wuurt euveral geroemp vanwaege zien goje tekste en sterk gitaarspel. De, ouk as docent songwriter aan de Fontys Rockacademie in Tilburg, werkzame leedjesmaker is eine echte verhaoleverteller en haet de gaeve mit zien beeldende tekste zien zeel bloeët te gaeve en andermans zeel te rake. Nao Arno Adams is hae de twieëde artiest dae de aanmoedigingspries van de Nach van ’t Limburgse Leed én de Veldeke Oeuvrepries wet te winne.

Reactie Ton Engels

“Ik vind waal det ik content mit mien oeuvre bin. As ik zoeë de hiele rie aan leedjes bekiek dink ik: d’r zitte eine houp goje dinger beej. Ik heb mich altied veurgehalde um meziek te make dae ik, as ’t op de radio veurbeej kump, ik zelf de meujte waerd zoel vinde en ouk zoel wille aanschaffe. Beej ’t meiste van wat ik heb gemak is det wies op d’n daag van vandaag zoeë. Mien oeuvre greujt nog altied, maar as ik iets nies maak mót ’t per definitie ouk iets toevoge. ’t Mót neet ein herhaling zien van wat ik al heb, al wuurt die kans netuurlik altied groeëter.”

← Ga terug