Veldeke Oeuvrepries 2020 veur Arno Adams

Det haet de Veldeke Venlo-veurzitter Henk Buskes zaoterdaagmiddaag bekind gemak in ‘t L1-radioprogramma Plat-eweg van Henk Hover . De oet Belfeld aafkómstige singer-songwriter wuurt dao mit geierd veur zien rieke oeuvre, det inmiddels besteit oet ónder mier zeve albums en ruum twieë decennia aan dialekmeziek. ‘t Oeuvre van Arno Adams wuurt nog altied oetgebreid: in de radio-oetzending kóndigde hae aan det d’r nog ein volledig album op de plenk leet, waat binnekort oetgebrach geit waere. De cd bevat materiaal det zestien jaor geleje is opgenaome, maar door umstandigheje noeëts is verschene.

Vanwege de coronamaotregels vindt de oetreiking van de Veldeke Oeuvre-Pries dit jaor neet zoeë as gebroekelik plaats tiejes de Nach van ’t Limburgse Leed: aangezeen ‘t aevenement is aafgelas krieg Arno Adams ziene pries, ein kunswerk van Mariëlle Franssen op vriedaag 18 september in ‘t tillelevisieprogramma Nedinscoplein op Umroop Venlo.

Al ruum twieë decennia mak Arno Adams op gehiel eige wies dialekleedjes. Mit zien herkinbaar stumgeluud zingk hae euver waat hae zoeëal in zien laeve haet meigemak of um zich haer zuut gebeure. ‘t Levert ierlike, rauwe leedjes mit ein reifelrendje op, Dök zien ’t leedjes mit ein bluestintje. Alles waat Arno mak kump rech oet zien hert en is dus puur. Zónder concessies te doon hilt de talentvolle en authentieke Belfeldse singer-songwriter zich al jaorelank staonde in ‘t dialekmeziekwaereldje en haet hae ein indrökwekkend oeuvre opgebouwd.

De Veldeke Oeuvrepries wuurt sinds 2007 toegekind door Veldeke Venlo. Me iert heej mei ‘t oeuvre van ‘ne arties dae zich in zien of eur carrière op ein bezóndere meneer verdeenstelik haet gemak veur de Limburgstalige meziek. Op dees meneer haet d’r zich eine indrökwekkende ierelies gevormp sinds 2007:

  • 2007 Jan Theelen
  • 2008 Hannelore Winter
  • 2009 Wooden Chain
  • 2010 Sjef Diederen †
  • 2011 Ben Verdellen
  • 2012 Nol Wassen †
  • 2013 Guus Smeets †
  • 2014 Um & Um
  • 2015 Jack Vinders
  • 2016 Thei en Marij
  • 2017 Henk Steijvers
  • 2018 Gé Reinders
  • 2019 Neutjesrang
  • 2020 Arno Adams
← Ga terug