Veldeke Oeuvrepries 2023 veur De Drekskaters
De Venlose formatie De Drekskaters krijg dit jaor de Veldeke Oeuvrepries vaan ’t Limburgse Leed. De gróp, dee al decennialang actief is weurt mèt de pries geïerd veur zien umvaankriek oeuvre en zien verdeenste veur ’t Limburgse leed. De band oontvingk de pries op donderdag 14 september tijdens de ‘veurpreufnach’ vaan de Nach van ’t Limburgse Leed bij ‘ne speciaolen aovend in kaffee De Blauwe Trap in Venlo. Vaanaof 20.30 oor weure De Drekskaters in ’t zunneke gezat en oontvaange ze d’n Oeuvrepries. De band trejt deen aovend ouch op. D’n aovend is ’ne sponsoraovend en aovend veur de vrun vaan de Nach vaan ’t Limburgse Leed meh is ouch touwgaankelek veur ander geïntrèsseerde.
De Drekskaters
De Drekskaters is d’n awste en nog ummertouw actieve Venlose dialekband. De gróp woort in 1982 opgeriech es The Thrashcats meh in 1984 woort de naom veranderd in De Drekskaters. In datzelfde jaor versjijnt d’n debuutsingle ‘Rok en Rool duit ’t gans’. Rock‘n’Roll en Rockabilly vörme de roejen draod in de loupbaon vaan De Drekskaters, meh ouch ander meziekstijle speule ’n rol. En dao is nog eine stabiele factor: alles weurt gezoonge in ’t Venloos dialek. Tot de klassiekers behure nómmers wie ‘In dees stad’, ‘Blief vaan mien beer ‘, ‘Stök in miene geter’ en netuurlek de Venlose revue cover ‘Getske van gelök’. Optrejjes vaan de energieke Drekskaters swinge nog altied: de band steit, ouch daankzij de zoe herkinbare zaank vaan Marco Schell, wie ’n hoes en wèt al decennialaank euveral sfeer te bringe. De zouws De Drekskaters zelfs kinne besjouwe es de moojer vaan alle Venlose dialekbands: edere lateren act is zoonder twiefel sjatpliechteg aon de gróp dee neet weg te dinke is oet de lokaol meziekscene. De huidege formatie besteit oet Marco Schelle, Roger Cornelisse, Mylène Schrijen, Werner van Gool, Charles Coppens en Duncan Tilmans.
Motivering Dialekvereineging Veldeke Venlo
Veldeke Venlo veurzitter Bas Vissers: “De Drekskaters, dat is boe de Venlose dialekmeziekgolf zienen oersprunk heet. Ze höbbe ein vaan de ierste stein gelag veur ’t tegenwoordeg bouwwerk vaan de Venlose dialekmeziek. Zie zien de inspiratie gewees veur hiel get gróppe die nao hun zien gekoume, die ouch weer ander weeg zien ingeslage. De Drekskaters höbbe altied hunnen eige rockabillystijl behawwe en eus Venlose taol verriek mèt flink get sjoen wäörd en oetdrökkinge die min of mie aon hun zien goon touwbehure: ‘ein stök in miene geter’ en ‘blief van mien beer’ weure bekans otomatisch gekoppeld aon dees formatie. Ouch zien zie e soort breujnès gewees vaan talent: oet hun midde zien hiel get gooj muzikante gebore en dees muzikante höbbe weer eleminte vaan hunne stijl mètgenome nao de gróppe boe ze noe in speule. Kort gezag: De Drekskaters, es weegbereiiers veur d’n alternatieve Venlose meziek boete de vastelaovend, verdene deze pries es geinen andre gróp. ’t Is daan wel ‘nen oeuvrepries, meh veer hope netuurlek tot zie hun instruminte nog lang neet opberge en nog tot in lengde vaan jaore wijergoon. Veer zien d’n oeuvrepries daan ouch es ‘ne Veuraldoorgoonpries.”
Reactie vaan De Drekskaters
De bandlede reageerde blij verras naotot ze door Veldeke Venlo woorte benaoderd. Ze veule ziech vertgöld mèt de pries en zien gruuts tot hun oeuvre op dees meneer bekroend weurt. Ze nudege daan ouch ederein dee de band e werm hart touwdreug um op 14 september aonwezeg te zien bij de oetreiking en dao ouch te koume genete vaan e spetterend optrejje.
