Veldeke oontslut arsjief Limburgse poëzie vaan Veldgewas

E jaor of 7 geleie startde auteur en diechter Wim Kuipers same mèt ziene kompaan Har Sniekers mèt Veldgewas, ‘nen online mailservice veur Limburgstaolege poëzie. Limburgse diechters kóste hun veerze insjikke nao Veldgewas, wat daan zörgde veur verspreiing oonder ’n gróp vaste abonnees.

Sinds deen tied heet Veldgewas hoonderde gediechte in ’t Limburgs verzameld en roondgesjik. Tot ’n degeleke inventarisatie vaan al die poëzie is ’t tot noe touw neet gekoume. Veldeke heet noe in samespraok mèt Wim Kuipers de taak op ziech genome al die gediechte te ordene en in ‘n Arsjief bijein te plaotse.

Alle gediechte die oets in Veldgewas versjene zien, weure per auteur in chronologische volgorde aongebooje. Daoneve weurt vaan ederen auteur zoe väöl meugelek achtergroond informatie verstrèk. Dat arsjivere is mónnikewerk en steit daorum veurluipeg nog oonder ’t motto “werk in oetveuring”. Meh dao is oondertösse genóg materiaol bijein gezeumerd um ’t arsjief te opene veur belaankstèllende.

Dat arsjief heet es naom De Moenik gekrege. ‘ne Moenik is ’n bergplaots in ’n sjeur. Kinder maakde ziech e kuilke in ’t hui of ’t stru en verstoompelde dao appels, pere en neut, zoetot ander kinder die neet gemekelek kóste vinde.

Bij Veldeke hoof geer neet zoe lang te zeuke. Meh ’t plezeer vaan ’t oontdèkke blijf eve groet. Geer kint ’t Veldgewas Arsjief hei bezeuke.

 

← Ga terug