Veldeke op weeg nao 2026 (‘t vervolg)
In 2026 besteit dialekvereineging Veldeke 100 jaor. En ’t provinciaol bestuur heet de ambitie um veur deen tied Veldeke gereid te make veur de touwkoms. Dat beteikent tot d’r daan ’n vitaal en aontrèkkeleke vereineging moot stoon die activiteite organiseert die ’t gebruuk vaan ’t Limburgs in de openbaar ruimte, op sjaol, in de werkumgeving en thoes faciliteert en normaliseert. Zoe steit dat entans geformuleerd in ’t veurluipeg visiedocumint wat is opgestèld nao aonleiing vaan ‘n dreital brainstörmsessies die provinciaol en lokaol bestuurslede vaan Veldeke in de loup vaan de ierste maonde vaan dit jaor höbbe gehawwe.
Visiedocumint Veldeke 2026
Oet dat documint weurt ouch dudelek tot nog hiel get moot gebäöre veurtot die visie werkelekheid is gewore. Zoe zal d’n organisatorische basis vaan de vereineging versterk dene te weure. Zoe zalle nui producte en deenste oontwikkeld mote weure. Zoe zal de positie in ’t oonderwies verbeterd mote weure. En neet in de lèste plaots zal ouch ’t imago vaan Veldeke verbeterd mote weure. Gebrek aon ambitie kint me ’t provinciaol bestuur dus neet oontzègke. En ein dingk wèrk in ’t veurdeil: ’t doort nog evekes veurtot ‘t 2026 is, dus dao is nog tied um ein en ander te verandere.
Limburgeringscursus
De veurluipeg lèste “heisessie” voont plaots op 26 juni in de ECI Cultuurfebrik in Remund. Tijdens die vergadering zien versjèllende ideeje besproke die zouwe kinne bijdrage aon ’t bereike vaan ’t gestèlde doel. Zoe is gesproke euver ’t obbenuits geve vaan ‘ne Liergaank Limburgs, e soort kadercursus boemèt belangstèllende kinne weure opgeleid um de Limburgse taol in al zien aspekte beter te kinne begriepe en ouch te kinne euverdrage aon andere; daomèt weurt dus ouch tegemoot gekoume aon de vraog um docente die cursusse kinne geve in de versjèllende dialekte vaan de Limburgse taol. Meh ouch ’ne ‘Limburgeringscursus’ woort geopperd, um lui die vaan boete koume en die get mie wèlle wete vaan de provincie boe ze in terech zien gekoume, in te wije in de Limburgse taol, cultuur en historie.
Fundamenteel oonderzeuk
Wijer woort gepleit veur ’t hawwe vaan e fundamenteel oonderzeuk nao “De stand vaan ’t Limburgs”. Es Veldeke vaan alles wèlt verandere daan zal toch iers in kaart mote weure gebrach wie de situatie vaan de Limburgse taol op dit moment deveur steit. Neet allein wee en wie väöl inwoeners vaan Limburg dialek spreke, leze of sjrieve, meh ouch boe en wienie ze dat doen. En wat veur barrières ze tege koume es ze dat wèlle doen. In 2026 kint daan obbenuits zoe’n oonderzeuk weure gehawwe um te kieke wat noe zjus veranderd is. Ouch professioneel oondersteuning op ’t gebeed vaan marketing communicatie is aon de orde gewees. ’t Medialandsjap verandert in zoe’n rap tempo tot dat veur vrijwèllegers ummertouw meujeleker te euverzien en bij te hawwe is.
‘t Woord aon de polletiek
Zoe woorte nog väöl mie ideeje geopperd die allemaol in de loup vaan de koumende weke door ’t provinciaol bestuur geëvalueerd zalle weure en daonao zalle weure veurgelag aon de lokaol kring. Oeteindelek zal dat rizzeltere in ’n definitief visiedocument wat naomens Veldeke zal weure aongebooje aon de provinciaol polletiek mèt ’t oug op de noedzakeleke financiering. Tot ’t nui College vaan Gedeputeerde Staote ziech in häör program oetdrökkelek heet oetgesproke um de Limburgse taol in samewèrking mèt de streektaolaorganisaties te goon bevordere, gief vertrouwe tot eus planne dao op ’n positief meneer oontvaange zalle weure.
Neet alles geit verandere
Ein en ander wèlt neet zègke tot Veldeke noe gans op de sjöp geit. ’n Hieleboel vaan wat veer doen, doen veer good. Op lokaol nivo organisere de 10 Veldeke kring vaan alles um de Limburgse taol levendeg te hawwe en dat doen ze dèks mèt väöl succes. Meh mèt ’t oug op de touwkoms en op de positieve sfeer boe-in de Limburgse taol ziech momenteel maag verheuge, mage veer eus ambities bès get hoeger opsjrouve. Veer hawwe uuch op de huugde vaan wat steit te gebäöre.
Foto’s Riky Simons