Veldeke Pluum 2022 veur Rob van Deurzen

Op zaoterdig 10 september haet Rob van Deurzen oet henj van Henk Giesbers, veurzitter van de Veldeke-Krink Remunj, de Veldeke Pluum 2022 gekrege. Dit gebeurde tiedes de Veldeke Kringekontaktdaag, dae dit jaor róndjóm de Kapel in het Zand in Remunj gehaje waerde.

Journalis VIA

Rob is van hoes oet journalis bie de tante Bet en ónger meer verantjwoordelik veur het super-plaatselike Midde-Limburgse nuuts. Det duit hae mit väöl elan in de VIA, dé waekgezet van Limburg. In dees gezet waert aandach gegaeve aan ’t alledaags plaatselike nuuts oet de Limburgse wieke, dörpe en sjtaej.

Kaketoes

Daonaeve sjpeelt hae aan de Kapel in Remunj ’n veuraansjtaonde rol. Hae is in 2009 prins gewaes bie VV de Kaketoes. ’t Waord Kaketoe is toet sjtandj gekómme oet de wäörd KA(pel), KE(mp) en TOES). Ouch is hae vice-veurzitter van ’t Kaketoebesjtuur. De Kaketoes höbbe e eige liefblaad, de Kaketoegezet. Dees gezet waert gans in ’t plaatselijk dialect gesjreve en ederein sjnap ’t al: de biedraag van Rob aan dees gezet is groot. Rob geit zelfs de eindredactie euver dees gezet veure.

Veer, van de Veldeke-Krink Remunj zeen greuts op zónne miens dae alles waat mit volkskultuur en Midde-Limburg te make haet ónger de miense brink. En veer zeen nog greutser op zónne miens dae actief bezig is mit ’t oetdrage van oze Limburgse taal. Zónne man wie Rob verdeent ’n dieke pluum: de Veldeke Pluum 2022.

 

← Ga terug