Veldeke prizzenteert zie Jaorbook 2018

Op 26 juni j.l prizzenteerde Veldeke Limburg in de ECI Cultuurfebrik in Remund zie Jaorbook euver 2018, boe-in zoe wie gebrukelek ’n euverziech weurt gegeve vaan wat ziech ’t aofgeloupe jaor heet veurgedoon op ’t gebeed vaan oonderzeuk en publicaties euver de Limburgse taol en volkscultuur. Deze kier is aondach gegeve aon oondermie de Benrather Linie, in ’n artikel vaan Lei Heijenrath euver de taolgrens die e klein stökske vaan Limburg roond Vaols en Kèrkraoj sjeit vaan de res door’n klaankversjuiving die mie riechting ’t Duits geit. Els Diederen gief in ’t Jaorbook ’n oetgebreide besjrijving vaan de groete variëteit aon Limburgse naome die gebruuk weure um blomme en plante te beneume.

En daan vinde veer nog ’n artikel vaan de veerse winnares vaan de Jo Hansenpries, Netty Engels euver bokeskook, e verslaag vaan de finale vaan de Veldeke Declamatiewedstrijd vaan de hand vaan Riky Simons en twie wetensjappeleke artikelen vaan promovendae vaan Prof. Leonie Cornips euver aspekte vaan dialekspreke door kinder. Peter Klein teikent veur ’t artikel dat de illustratie op d’n umslaag vaan ’t Jaorbook lievert: ’t dialeklandsjap vaan de gemeinte Vaols.

Ierste exemplaar veur Els Diederen

’t Ierste exemplaar vaan ’t Jaorbook woort door ein vaan de redacteure, Pierre Bakkes, oetgereik aon Els Diederen, boebij heer Els reumde um häör verdeenste es bestuurslid vaan de Veldeke Krink Valkeberg en zeker ouch veur häör artikele euver volkscultureel oonderwerpe in de Veldeke Jaorbeuk vaan de aofgeloupe jaore. Pierre Bakkes liechde d’n inhaajd vaan ’t Jaorbook touw veur de aonwezege luustereers en Ton Engels zóng versjèllende vaan zien Limburgstaolege leedsjes (songs) boe-oonder ’t bekinde ‘Kal toch plat’. Dat lèste brach de Veldeke veurzitter Christine van Basten in häör eindwoord tot de verzöchting tot Ton in éi leedsje wèt oet te drökke boe Veldeke soms ‘ne ganse middag euver moot vergad ere. Zie voont dan ouch tot ziene naom Ton Limburgs zouw mote zien in plaots vaan Ton Engels.

De redactie vaan ’t Veldeke Jaorbook 2018 waor in de vertrouwde han vaan Pierre Bakkes, Peter Klein en Ton van de Wijngaard. ’t Book kos € 20,00 (exclusief versjikkoste) en kint bestèld weure via de winkel op de website vaan Veldeke of per mail via ’t Huis voor de Kunsten.

Foto’s: Riky Simons

← Ga terug