Veldeke Sjrieverskrink prizzenteert dialekmiddag
In samewèrking mèt Gilde de Graven organiseert de Provinciaole Sjrieverskrink vaan Veldeke ‘ne middag mèt tekste en veurdrachte in versjèllende Limburgse dialekte. Zoe zal ouch ’n lezing weure gehawwe euver ’t versjèl tösse taol en dialek, de versjèllende Limburgse dialekte en dialek spreke mèt kinder. Meh dao is netuurlek ouch tied veur Limburgse verhaole en gediechte.Sprekers zien Colla Bemelmans (Nuth), Marleen Schmitz (Montfort), John Hertogh (Sittard), Toos Schoenmakers (Vlodrop), Annie Tummers (Kerkrade) en Mien Wijnhoven (Sevenum).
Provinciaole Sjrieverskrink Veldeke
De Provinciaole Sjrieverskrink Veldeke besteit sinds 1992, dus al 30 jaor. Nege sjrijvers koume um de maond bijein bij de Vief Heringe in Sittard. Colla Bemelmans sjrijf dao-euver: ”Dao besjpraeke veer ós werke en perbeiere dao get van te lere. Veer gaon dao krities mer leif mit óm; veer respekteiere neit allein waat veer sjrieve, mer ouch wie veer dènke. Dat kump ómdat veer in de loup van de jaore eine gróp vrunj zeen gewore”. En: “Mit experimentele opdrachte perbeiere veer ós taalgevuil te verbaetere.”
Donderdagmiddag 13 oktober in Munstergeleen
De middag vint plaots op donderdag 13 oktober aonstaonde vaan 14.00 tot 16.00 oor in Munstergeleen aon de Pancratiusstraat 24. Gilde de Graven heet dao de besjikking euver ’n sjoen locatie neve ’t Gemeinsjapshoes. Dao is genóg parkeergelegenheid en in de poos kint gebruuk weure gemaak vaan de gezèllege bar vaan ’t Trefpunt. De koste zien € 7,00. Geer kint uuch insjrieve op de website vaan Gilde de Graven