Veldeke Theater Mestreech prizzenteert ‘Pa’

Nao de succesvol theaterproducties in 2015 en 2017 prizzenteert Veldeke Theater dit naojaor e nui serieus stök: ‘Pa’. Mèt de speulers Will Wintjens, Hortense Brounts, Elly Theunissen, Yuri Michielsen, Jeanette Klein Essink en Paul Fisette.

Pa is ‘n Mestreechse vertaoling vaan ‘t Frans toneelstök Le Père. ‘t Stök liet op ‘n indringende meneer, meh neet zoonder humor, de geisteleken achteroetgaank vaan ‘ne maan op leeftied zien. ‘t Publiek zuut door de ouge vaan pa de werkelekheid verandere. e Toneelstök dat neve ‘ne lach vaan herkinning, mesjiens ouch hei en dao e träönsje teveursjijn touvert.

De speulers vaan Veldeke Theater höbbe same mèt regisseur Pim Horio maondelaank gewèrk um dees bezunder productie op de buun te zètte. ’t Heet väöl inlevingsvermoge vaan veural Will geverg meh oetindelek veult heer ziech gans “thoes” in zien rol vaan Pa. Vörmgeefster Katrin Henss heet gezörg veur e prachteg pleetsje debij.

Umtot de 6 opveuringe in de veurverkoup vaan d’n Theater al metein waore oetverkoch heet Veldeke Theater beslote 2 extra opveuringe in te planne. Ouch die waore in ‘ne vlook en ‘ne zöch oetverkoch. De veurstèllinge vinde plaots in de bovezaol vaan d’n Theater aon ’t Vriethof tösse 25 oktober en 3 november.

← Ga terug