Veldeke Vastelaovends Cabberèt: de veurlèste kier…
“Vaang d’ch ‘ne beer!” Dat is d’n titel vaan ‘t 18e Veldeke Vastelaovends Cabberèt wat vriedag 19 jannewarie a.s. um 20.00 oor in de Bonbonnière in Mestreech in première geit. ’t Cabberèt steit bekind um ziene carnavalesquen humor, e bitteke ironie en satire, gebaseerd op alledaogse dinger, herkinbaar thema’s en oonderwerpe. ’t Weurt ’t veurlèste jaor veur ’t Cabberèt-ensemble wat besteit oet Hortense Brounts, Els Ottenheym, Elly Theunissen, Phil Dumoulin, Will Wintjens en Twajn Weijenberg. In fibberwarie 2019 volg nog eine kier ’n lèste serie veurstèllinge en daan is ‘t gedoon.
’t Thema vaan dit jaor “Vaang d’ch ‘ne beer”is gebaseerd op de klein ergernisse die ederein wel ins heet euver bapaolde persoene, de polletiek, gebäörtenisse of raar dinkbeelde. De kumps ’t daogeleks tege, zuus ’t op d’n tèllevisie, leus ’t in de gezèt of maaks ’t mèt op de werk. Zjus dao ligk de krach vaan ’t Veldeke Vastelaovends Cabberèt: ’t is vaan de ierste tot de lèste menuut herkinbaar. ’t Ensemble hèlt diech es ’t woere ‘ne spiegel veur, miestal mèt ‘ne lach en soms mèt ’n traon. De bekans 2,5 oor dorende veurstèlling besteit aofwisselend oet sketches en meziek.
De begeleiding vaan ’t Veldeke Vastelaovends Cabberèt weurt al jaore verzörg door ’t vaste combo oonder leiing vaan Ben Perry. Deze muzikalen doenzendpoet sjrijf arrangeminte bij de leedtekste en touvert bekinde chansons um tot muzikaal meisterwèrkskes. ’t Combo besteit wijer oet Frans van Vliet (accordeon) en John Westenberg (drum). Ein vaan de hoegtepunte boe ’t publiek eder jaor vaan geneet is ’t mètzinge mèt aw en nui Mestreechter vastelaovendsleedsjes.
In 2019 vèlt ’t dook veur de lèste kier veur ’t ensemble. “V’r höbbe eus publiek oonvergeteleke middege en aovende bezörg. En ’t mieste plezeer höbbe v’r altied zelf. V’r doen nog twie series vaan zeve veurstèllinge en daonao is ’t gedoon en weurt ’t tied veur get nuits. Nao 19 jaor is ’t good gewees. V’r mage gerös gruuts zien tot v’r ’t zoe lang höbbe volgehawwe!”, aldus Hortense Brounts, veurzitter vaan de Veldeke Krink Mestreech én Cabberèt-lid.
De zeve veurstèllinge vinde plaots op 19, 20, 21, 26, 27 (2x) en 28 jannewarie in de sfeervolle Bonbonnière in ’t aajd stadscentrum vaan Mestreech, Dao zien nog mer en paar keertsjes te kriege veur de zoe good es oetverkochde veurstèllinge. Op de website www.theateraanhet vrijthof.nl vint geer mie informatie.
(Mestreechs)