Veldeke Vastelaovends Cabberèt gestop

Dao kump gein lèste editie vaan ’t Veldeke Vastelaovends Cabberèt in 2019. De cabbarètlede en ’t bestuur vaan de Veldeke Krink Mestreech zien dat in euverlèg euvereingekoume. ’t Is ‘t definitief eind vaan ‘n hiel succesvol humoristisch ensemble, wat tiendoezende lui oet Mestreech en wied daoboete 18 jaor laank oonvergeteleke Mestreechse cabbarètmiddaog en -aovende heet bezörg.

In jannewarie vaan dit jaor woort aongekóndeg tot de editie vaan 2019 de lèste zouw zien. In de loup vaan 2018 woort dudelek tot dees lèste cabbarètserie neet te realisere is. E paar lede vaan de cabbarètgróp höbbe vaanwege hun moverende reie hun mètwèrking aon ’t cabbarèt mote opzègke. Doorgoon mèt ’t cabbarèt is oonder dees umstandeghede veur de euverege lede gein optie.

Spieteg

Veurzitter  Hortense Brounts: “Hiel erg spieteg tot v’r die fantastische cabberètjaore op dees meneer mote aofslete.  ’t Cabberèt maag gruuts zien op 18 oonvergeteleke jaore boe-in lol en plezeer veur pebliek en speulers altied veurop höbbe gestande. Iech dink tot Mestreech us geit misse.  ’t Bestuur vaan Veldeke Krink Mestreech is alle mètwèrkers vaan ’t Cabberèt en netuurlek ouch ’t pebliek hiel daankbaar veur de aofgeloupe jaore.”

’t Cabbarèt kraog veural bekindheid vaanwege de ironie en satire. Gebaseerd op alledaogse dinger lete ze herkinbaar thema’s en oonderwèrpe de revue passere. Zjus dao-in laog de kracht vaan ’t Veldeke vastelaovends Cabbarèt; ’t waor vaan de ierste tot de lèste menuut herkinbaar. ’t Ensemble leet diech bij wijs vaan spreke nao diech zelf kieke in de spiegel, miestal mèt ‘ne lach en soms mèt ’n traon.

In 2020 e vervolg

Meh de Veldeke Krink Mestreech liet zien lede neet in de kaw stoon. Vaanaof 2020 zal dao roond vastelaovend e nui program weure opgestart. Dat zal gans get anders weure es ’t cabbarèt meh es veer de veurteikene mage geluive zal ’t zeker neet minder leuk weure. Euver de perceize vörm en inhaajd geit ’n commissie vaan de Veldeke Krink Mestreech ziech de koumenden tied buige. Veer hawwe uuch op de huugde.

 

← Ga terug