Veldgewas besteit 10 jaor

Op 27 jannewarie 2011 versjeen de ierste editie vaan Veldgewas. Veldgewas is ’n online periodiek veur Limburgse poëzie. Wim Kuipers en Har Sniekers stoonte 10 jaor geleie aon de weeg vaan Veldgewas. Zie voonte tot dao te wieneg aondach waor veur Limburgstaolege literatuur. ’t Tiedsjrif van Veldeke, boe-in regelmaoteg gediechte en prozastökker in de Limburgse taol woorte aofgedrök, waor e paar jaor daoveur opgehawwe te bestoon. De Veldeke literatuurpries dreigde door gebrek aon auteurs te verdwijne. En op internèt waor al hielemaol gei podium wat aondach besteide aon de Limburgse literatuur. Veldgewas waor bedoeld um die lacune op te völle.

Wee belaankstèlling had veur Limburgstaolege poëzie kós ziech gratis abonnere op Veldgewas en kraog daan e paar kier per week gediechte in de versjèllende variante vaan ’t Limburgs in de digitaal brevebös. Veur dae inhaajd waore de initiatiefnummers aofhaankelek vaan wat ze krege touwgesjik door de sjrijvers. Gelökkeg waore – zeker in ’t begin – genóg sjrijvers bereid um hun tekste nao Veldgewas op te sjikke. Zoe bouwde de rubriek ’n imposante rij vaan tientalle deilnummers op die op d’n doer good waore veur hoonderde en hoonderde gediechte.

Meh Wim Kuipers, dee ziech ’t bestoon vaan Veldgewas ’t mies aontrók, mèrkde wel tot ’t ummertouw lèsteger woort um nui diechters te vinde die hun bijdraog wouwe lievere. In de loup vaan d’n tied góng Veldgewas mie en mie gebruuk make vaan ’ne vaste kern vaan auteurs die euver alderhand oonderwerpe hun gedachte in diechvörm vörm gaove. Versjèllende kiere heet Wim Kuipers euverwoge um ’ne punt achter de rubriek te zètte meh ederskier bleke toch weer genóg sjoen gediechte binne te koume um daovaan aof te zeen. Daoneve góng Wim Veldgewas ouch gebruke um zien eige gedachte euver de stand vaan de Limburgse taol, “Oos Taal” wie heer dat neump, aon de openbaarheid pries te geve. En dao heet heer oetgesproke opvattinge euver.

Al mèt al viert Veldgewas noe zien tienjaoreg zjubelei en dat is get um evekes bij stèl te stoon. Veer felicitere Wim Kuipers mèt ’t bereike vaan deze mijlpaol. En veer hope tot zien vashawwendheid tot rizzeltaot zal höbbe tot ouch weer nui diechters ziech gerope veule um in ’t Limburgs te goon diechte en ziech nui abonnees opgeve. Det kan zónger verplichtinge op veldgewas@home.nl. Mie informatie euver de rubriek Veldgewas vint geer op deze pagina.