Verhäölkes in ós Limburgs plat

Ja, ’t is biej de drökker: ’t nuuj beukske mit verhäölkes veur kinjer in ós Limburgs plat! Half november is ’t zo wied. Den versjient ’t in mer leefs ach edities. Ein in ’t plat van alle oorsjprónkelike sjrievers, zeve vertaalde versies in ’t dialek van de Veldekekringe die mitdoon aan dit projek.

De kemissie Volkscultuur, die geregeld te heure kreeg det d’r zo weinig materiaal is om veur te laeze aan de kinjer, deej ‘ne oproop aan Limburgstalige sjrievers óm ’n verhaol aan te levere. Det haaj es rizzeltaat ’n bóntj geheel van dialekte, mer ouch van saorte verhäölkes: euver dinger die kinjer kènne mitmake in häör dageliks laeve, tiedes ’n oetsjtepke of feeske. Zich aafsjpelend op ’n Limburgse locatie of geweun thoes, fantasie of ech gebeurd, euver beeste of kebuiterkes. Heel kort of toch get langer, veur peuters, kleuters en basissjoolkinjer. Van bekènde en minder bekènde sjrievers. 26 alles biejein.

Óm veur te laeze door eljers en grooteljers of óm zelf te laeze en veur te laeze aan ’n jónger breurke of zöske. Mer de meister of juf leefs ouch.

De Raod veur ’t Limburgs wooj waal sjteune, zodet de beukskes veur ‘ne sjappelike pries verkoch kènne waere. Ouch wilt de Raod ’n exemplaar veur alle Limburgse bibliotheke beköstige. En Veldeke Limburg wilt op 100 sjole ’n exemplaar laote bezorge. Sjiek.

Veur dialekleefhöbbers die zelf ’n exemplaar wille rizzervere: kiek oppe site van de betreffende krink.

De oplage waert neet heel erg groot. Reservere is waal henjig. Veur Veldekelede geit ’n beukske maximaal € 10,- koste.

Oppe Facebookpagina veur dit beukske is ouch de neudige info te vinje en kómmende waeke get sjtökskes van verhäölkes.

← Ga terug