Verjongingskuur Veldeke Krink Mestreech

’t Is e probleem boe mie vereineginge mèt worstele: de vergrijzing vaan hun ledebestand. Oet oonderzeuk wat Veldeke Krink Mestreech recentelek oonder zien lede heelt, bleek tot ouch Veldeke dao neet aon oontkump. Dus is de Veldeke Krink Mestreech begonne mèt ’n verjongingskuur. Dat wèlt zègke tot ze aon ’t oetzeuke zien op wat veur menere jonger lui – en daan praote veer euver daartegers en veertegers – betrokke kinne weure bij de doelstèlling vaan Veldeke: ’t behaajd en bevordere vaan de Mestreechter taol.

Jong lui wèlle ziech neet binde

Ein vaande oetgaankspunte daobij is tot ’t neet zoe väöl zin heet te perbere um jong lui lid te make vaan de vereineging, laot stoon um ze tot bestuurslid te bombardere. De jäög vaan tegenwoordeg liet ziech neet mie zoe gemekelek verleie um ziech te binde aon langloupende verpliechtinge. Daoveur höbbe die ’t váöl te drök en höbbe ze väöl te väöl ander intrèsses. Meh mesjiens zien jong lui wel te bewege um deil te numme aon korter dorende projecte mèt ’n dudelek begin en ind droan. Want ’t is neet zoe tot ze neet veur de Mestreechter taol zouwe veule: integendeil: op Facebook en Twitter en ander social media weurt volop in ’t dialek gesjreve.

Grópsgesprek met jong lui

Um nao te goon wie jonger lui te intrèssere zien veur boe Veldeke veur steit, heet Veldeke Mestreech e grópsgesprek georganiseerd boe-aon e stök of 10 jongere tösse de 25 en de 35 jaor deilnaome. ’t Woort ’n geanimeerde bijeinkoms boe-oet bleek tot de Mestreechter taol de deilnummers wel degelek aon ‘t hart geit. Allein op ’n ander meneer es tot Veldeke gewoen is. Zoe laote zie ziech minder draon gelege ligke of alle wäörd die ze gebruke wel “ech Mestreechs” zien en ouch mèt ’t sjrieve vaan Mestreechse wäörd zien ze minder perceis. ’n Taol verandert, is hun opvatting, en dus zal ouch ’t Mestreechs ander wäörd goon gebruke.

Mestreechter taol ouch veur jong lui belaankriek

De deilnummers aon ’t gesprek hadde ouch ‘ne gansen houp concrete ideeë euver wie Veldeke hun ginneratie zouw kinne bereike. Neet mèt e lidmaotsjap inderdaod, meh wel door aon te slete bij media en eveneminte boe zie toch al bij betrokke zien, zoe wie festivals of sportwedstrijde. En door jong lui de kans te geve in kontak te koume mèt leeftiedgenote. Want zjus in die kontakte bliek tot de Mestreechter taol ouch veur jong lui e belaankriek oonderdeil vaan hun identiteit is. En mèt vaan de belaankriekste kontakte loupe netuurlek via de social media.

Vaan de jäög vèlt nog wel ein en ander te liere

Mestreech is euveregens neet d’n einege krink dee zien oer te luustere heet gelag bij de jäög: ouch de Veldeke Krink Ech heet al grópsgesprekke georganiseerd um hun leech op te steke euver wie ze jong lui kinne bereike en betrèkke bij Veldeke. Dat blieke inspirerende gesprekke te zien boe-oet ‘nen hieleboel te liere vèlt veur de touwkoms vaan eus vereineging.