Veurlaeze oppe basissjool in Zjwame

Vanwaege de kinjerbokewaek haaj basissjool De Octopus in Zjwame Riky Simons-Julicher gevraog óm in alle 13 groepe ’n keteer te kómme veurlaeze in ‘t Zjwaams. Dao kós natuurlik neet nae taenge waere gezag. Geweldig es zó’n sjool zelf ’t initiatief nump.

De jóngste kinjer krege versjes te heure oet zien veurlaeswaordebeukske veur peuters en kleuters, wovan 15 oktober de herdrök oetkump, vanaaf groep drie waerde veurgelaeze oet ’t veurig jaor oetgegaeve Verhäölkes in ós Limburgs plat.

Veur groep 7 en 8 woor d’r ‘n eige versie van ‘t verhaol van de Zjwamer brögkheilige Nepomuk en ‘n grappig verhaol oet ’t Remunjse beukske ‘Loester ins’. De illusjtraties biej al die verhaole en versjes oppe achtergróndj deje ‘t ouch good. Väöl aandach vanne kinjer.

En… de meiste kinjer sjtaoke de vinger op wie gevraog waerde waem thoes plat kalt of det kan versjtaon. Zelfs ’n Syrisch kindj dörfde ’t aan óm ’n versje hel-op veur te laeze. Mer in ’t plat antjwaord gaeve in dees sjoolsituatie woor veur sommige kinjer toch ’n bietje te väöl gevraog.

Riky haaj nag ’n wèrkblaad gemaak veur groep 4 t/m 6: ‘n teikening van ’n boerderiej mit daonaeve ’n heel deil wäörd wovan de kinjer ’t bölke moge kleure es ‘t plaetje daovan oppe teikening veur kump. Groep 7 en 8 kreeg de tekste ouch op papier óm same in de klas nag ‘ns te laeze.

Sjiek det ’t zo kèn gaon op ’n Limburgse sjool. Det moge d’r bès nag get meer worden.

← Ga terug