Viefde Poëziewanjeling van Veldeke Krink Ech

’n Paar jaor al organiseertj de Krink Ech van Veldeke aan ’t ènj van de vekansieperiode ’n poëziewanjeling. Det is ’n wanjeling door ein van de dörpe of kerne van de krink, op afgespraoke plaatse óngerbraoke door väördrachte van gedichte of verhaole en meziek. Eerder wore d’r wanjelinge in Lilbosch, Zöstere, Staeveswaert, Ech-centrum. De poëziewanjeling van dit jaor zal in de meis zuidelike kern van de gemèndje Ech-Zöstere zeen: de Nuujsjtadt.  Dao höbbe w’r in äöverlèk en samewèrking mit de Heemkundevereniging en stadsgidse de plekke oetgezóch wo w’r langs wanjele en wo w’r effe stil staon ‘m te loestere. ‘t Zal den väör de viefdje kieër zeen, det Veldeke Krink Ech zo”n wanjeling organiseertj.

De wanjeling vuntj plaats op woonsdig 21 augustus taege de aovendj en w’r raekene daobie natuurlik weer op sjoan waer. Wie bie de poëziewanjelinge gebroekelik, is ’t ’n toch langs bekèndje of ónbekendje plekke, mer ’t is gein róndjleiding mit oetlèk! Speciaal aan dees wanjeling is det ’t verhaol van die plekke wo w’r aeve blieve stil staon, weurtj oetgedröktj in ’n gedich of verhaol. . Mitwèrking väör de intermezzo’s in poëzie en/of meziek haet Veldeke weer gezóchtj en gekrege bie ‘n aantal sjrievers van de Sjrieverskrink Midde-Limburg. Waem mit geit loupe mót raekening haoje mit ruum ’n oer wanjele en staon.

Nao opgave väöraaf waere 3 groepe van max. 30 persoane gevörmdj, zoadet de väördrachte ouch good te verstaon zeen. Det is weinig, gemaete nao de belangstèlling. Mer de echte leefhöbbers wete det ze zich oppertied mótte aanmelje. ’t Zólle ouch neet allein leje van de beide vereniginge zeen. Nao aafloup kan m’n ’n tas kóffie of get anges drènke en eventueel op terras biekómme en/of naopraote. Dit drenkske is inbegrepe in de deilnamepries van 4 euro p.p. dae w’r väöraaf bie opgave wille óntvange.

Aanmelje is op dit moment neet mieë mäogelik, ómdet ’t maximum aantal al is bereiktj. Waem zich aangemeldj haef, krig gein berich mer weurtj op woonsdig 21 augustus, 19.30 oer verwachtj op de Mert in de Nuujsjtadt.

← Ga terug