Vijf stare veur toneelstök vaan Veldeke Krink Mestreech

In De Limburger krijg ’t toneelstök “Aon die neut” vaan Veldeke Krink Mestreech vijf stare touwbedeild. De gezèt plaots es kop bove de recensie “Schaterlachen om het leed van de welopgevoeden” en dao is niks te väöl mèt gezag. Want al is ’t stök in weze deep tragisch, dao vèlt ouch genóg te lache. “Aon die neut” is ’n Mestreechse bewèrking vaan “Le Dieu du Carnage” vaan toneelsjrijfster Yasmina Reza. Will Wintjens zörgde veur de vertaoling in ‘t Mestreechs. ’t Vertèlt ’t verhaol vaan twie echpare die bij-ein koume um ziech oet te praote euver ’t feit tot hun twie zäöns ziech oonderein gebötteld höbbe. Daobij heet de zoon vaan de ein femilie de zoon vaan de ander twie tan oet z’ne moond gehouwe. Wat begint es e reielek gesprek um tot ’n regeling te koume, rizzelteert in ’ne complete veldslaag boebij me alle reielekheid liet vare.

De hoofrolle weure gespäöld door Will Wintjens, Elly Theunissen, Hortense Brounts en Toine Weijenberg. Dat zien inderdaod alle veer speulers vaan ’t Veldeke Vastelaovends Cabberet. Meh sinds einegen tied prizzenteert de Veldeke Krink Mestreech ziech ouch mèt serieuzer veurstèllinge. Twie jaor geleie waor dat mèt “Who’s afraid of Virginia Woolf”, oftewel in good Mestreechs: “Zal ins zien ofs diech neet bang bis”. En noe dus mèt e Frans stök. En es veer op de reacties vaan ’t publiek en de gezèt mage aofgoon, neet zoonder succes. Boemèt mer gezag wèlt zien tot de Mestreechter taol ziech neet allein veur de vastelaovend lient.

← Ga terug