Website Sectie Limburgs vaan Levende Talen noe online

De Sectie Limburgs vaan ‘Levende Talen’, de beroopsvereineging vaan taoldocente, is sinds kort online gegaange mèt ‘nen eige website. Op dee website weurt de missie vaan de Sectie Limburgs es volg geformuleerd: “Levende Talen Limburgs oondersteunt ’t Limburgs in ’t oonderwies, es ouch in de kinderopvaank, de zörg, op ’t werk, in ’t toerisme, thoes en in online umgevinge. ’t Limburgs is cruciaol in sociaol en regionaol identificatie in Limburg mèt de daobij behurende inclusief en oetsletende wèrkinge. Alle kinder in Limburg greuje op in ’n mietaolege umgeving. Mietaolegheid is vaan oonsjatbaar weerde in Limburg mèt zien unieke geografische ligking, zien euregionaol kinneseconomie en zien polletieke en sociaol-cultureel samewèrkingsverbande.”

Op de website publiceert de Sectie Limburgs ’n serie columns euver de positie vaan dialekte en regionaol minderheidstaole in ’t oonderwies elders in Europa en euver wie um te goon mèt dialekversjèlle in ’t oonderwies. Wijer is dao ’n euverziech vaan nuits en activiteite vaan de Sectie Limburgs te vinde. Ger kint de website via deze link bekieke.

Vereineging Levende Talen

Levende Talen is opgeriech in 1911 en is de ajdste beroopsvereineging vaan taoldocente in Nederland. De lede zien aofkomsteg oet alle sectore vaan ’t oonderwies, ze make dei loet vaan de secties Arabisch, Chinees, Duits, Ingels, Frans, Italiaons, Nederlands, Nederlandse gebaretaol, Papiamints, Pools, Russisch, Spaons, Törks en sinds kort dus ouch Limburgs.

De vereineging Levende Talen organiseert studiedaog en congresse euver taoloonderwies en informeert häör lede euver nuits en oontwikkelinge via de tiedsjrifte ‘Levende Talen Magazine’ en ‘Levende Talen Tijdschrift’, de sociaol media, de website, en via de websites, sociaol media en nuitsbreve vaan de taolsecties.

← Ga terug