Weer ’n Echter Dictee (oetgestèld vaanwege Corona)

Nao ’t succes van ’t ieëste Echter Dictee väörig jaor, zal Veldeke Krink Ech dit jaor weer ’n dictee organisere. Deilnumme kan ederein dae belangstèlling haet väör de Limburgse taal. De spelling van ’t dictee zal Echts zeen, ein van de mekkelikste dialekte. Väör de jury zal ’t Brónsgreun Beukske Ech-Zöstere es oetgangspuntj gelje. Mer bie väörkeur zeen de deilnummers ’t mitdoon aan dit dictee väóral es ’n plezerig spel róndjóm “wie mós se det sjrieve”. Wae d’r zoa instaptj hoof neet bang te zeen väör ’t roaje potload en zal zeker neet aafgaon, mer stuktj d’r altied get van op. ’t Motto van ’t Echter Dictee is neet väör niks: “Wae sjriftj dae bliftj”. Lever mit hie en dao ’n fout of twiefelpuntj gesjreve, den neet gesjreve!

’t Twieëdje Echter Dictee weurtj gehaoje in ’t Cultuurhoes Edith Stein aan de Plats op zóndig 15 mieërt a.s. vanaaf 14.00 oer. Waem aan de beoordeiling door de jury mit wiltj doon, deent väöraaf in te sjrieve. Det kan vanaaf noe door gebroek te make van de QR code, die hie ónger stuitj of oppe website van Veldeke Krink Ech.  Aan deiname zeen gein koste verbónje. De wènnieër van ’t dictee is degene dae volges de jury ’t dictee ’t bèste haet gemaaktj mit de minste foute in de gesjreve zinne. De betrokkene kömtj ’n jaor lank in ’t bezit van de wisseltroffee en óntvungtj daonao es blievendje herinnering de “Echter Krakeling”, net wie degene die op plaats 2 en 3 oetkómme.

Naeve dees officieel deilname is ouch de mäögelikheid “väör de joeks” mit te doon, bv óm èns te kieke wie det löktj. De minse die dit doon, kènne in de pauze hun eige dictee naokieke aan de handj van de geprojecteerdje gooj sjriefwieze.

NOTA BENE: VAANWEGE ‘T CORONAVIRUS IS ‘T ECHTER DICTEE VAAN 15 MIERT OETGESTÈLD TOT ‘NE NAODER AON TE GEVEN DAOTUM

Insjrieve kan mit de QR-code of via de website van Veldeke Krink Ech.