Werk insjikke veur 046 Sjrif (Zitterd)

In ’t naojaor van 2017 versjient de 1e editie van 046 Sjrif, eine bundel mit werk van dialeksjrievesj oet ós gemeinte Zitterd – Gelaen – Bor, oetgegaeve door de Veldeke Krènk Zitterd.

Veur dees eesjte editie haet me es thema Vandaag d’n daag gekaoze. Redacteur van dees oetgaaf is burgemeister Sjraar Cox. Hae zal ein selectie make oet ‘t ingesjikde werk en de inleijing verzörge.

Dialeksjrievesj, die wone of gebaore zeen in ós gemeinte, kènne uterlik pès 1 juli 2017 werk insjikke. Dat kènne bieveurbeeld verhaole, gedichte, columns of leidjestekste zeen (gein vastelaovesleidjes), es ’t thema mer Vandaag d’n daag is en d’r neit mee es 600 weurd gebroek waere. Geer kènt meerdere werke insjikke mer per sjriever waere d’r maximaal 2 werke in de bundel opgenómme.

Waat betruf de sjriefwies: veer gaon d’rvan oet dat me zich zoväöl muigelik hilt aan de Sjpelling 2003 veur de Limburgse dialekte. De tekste kènne aangeleverd waere bie de sikkertaris van Veldeke Krènk Zitterd, Patrick Werdens, e-mail: veldekezitterd@gmail.com.

Sjrievesj wovan ’t werk geselekteierd wurt kriege ein oetneudiging veur de presentatie en ein exemplaar van de bundel. Veer haope op sjoon biedrages!

 

← Ga terug