Wiel Vestjens euverleje

De Venlose vastelaoveszenger Wiel Vestjens is euverleje. De buutreedner, zenger kreeg in november nog de Golde Narrekap, de hoeëgste vastelaovesónderscheijing van Limburg. In ’t begin van de jaore zestig van de vurrige ieuw waas Wiel Vestjens al actief, dus al 5 x 11 jaor verzörgde hae optraejes op alle Limburgse podia.

De zenger dae vief kier ’t Limburgs Vastelaovesleedjes Konkoer (LVK) wis te winne same met ziene zangmaat Hay Crompvoets en in 2000 same met Gé Deenen. Heejmei is Wiel de meis succesvolle deilnemer van ’t LVK.

Wiel Vestjens is de stum van talloze Venlose vastelaovesklassiekers en zóng 34 nummers welke in de prieze vele beej Jocus. In 1976 wón Wiel de leedjesaovend in Venlo met ‘t in gans Limburg bekinde leed “As de sterre, dao baove straole”. Dao beej stónd hae regelmaotig op ‘t podium as buutreedner en speulde mei in Venlose Revues.

In november beej de prissentatie van de Buun 2018 zóng Wiel Vestjens nog twieë van zien klassiekers “Dit is de plaats” en “Waat vluug d’n tied”. Wiel Vestjens is 81 jaor gewaore.

(Venloos)

← Ga terug