Wim Heijmans wint Sjiek Literatuurpries 2019

Op ’t twiede Festiavel Sjiek kraog Wim Heijmans veur zie book D’r Jank van de tsiet de Sjiek Literatuurpries 2019. ’t Book bevat verhaole en gediechte en besjrieve e jaor oet ’t leve van e paar lui die us allemaol hiel bekind veurkoume. De jaorkrans weurt in poëtische wäörd besjreve, evenes ’t awwer weure, doed goon en de klein plezeerkes vaan ederen daag.

Wim Heijmans is zjus zeveteg gewore. Heer sjreef väöl toneeltekste, leedtekste, gediechte en verhaole in zien eige, Kerkraojs dialek en publiceerde ieder al Uvver klone, sjteremeëdjer en anger lu in 2004. Heer wón twie kier de Veldeke Literatuurpries. In zie werkzaom leve waor heer oonderwijzer. Heer zal, es oonderdeil vaan de pries, ouch langs ’n aontal middelbaar sjaole goon num euver zie werk te vertèlle.

De jury, dee  bestoont oet Jolien Linssen en Pierre Bakkes, waor bezunder gecharmeerd vaan d’n toen vaan ’t book en de stijl boein ’t gesjreve is. ’t Juryrapport kint geer hei inzien. Mèt D’r Jank van de tsiet realiseerde de Stiechting LiLiLi (Limburgs Literair Lies) zien tachtegste oetgaof.

De ander genomineerde veur de pries waore Annie Tummers-Huppertz veur häöre gediechteboondel  Ing mangel zonnesjtroale, ouch in ’t Kerkraojs, en d’n thriller Mo vaan de oet Sittard aofkomstege Lizette Colaris.

De Sjiek Literatuurpries weurt eine kier per jaor oetgereik aon ‘ne Limburgse sjrijver, de eine kier veur e werk in de Nederlandse taol en d’n andere kier veur e Limburgstaoleg werk. Verleie jaor wón Frans Budé oet Mestreech de pries veur ziene Nederlandstaolege roman De Dagen.

Wèlr geer mie wete euver d’n auteur, ’t book of Lilili daan kint geer terech bij oetgeverij TIC, tèllefoon 043-3262414 of kiek op de website vaan d’n oetgever.

← Ga terug