Winners declamatiewedstrijden Venlo en Tegele bekind

Veuraofgaond aon de Limburgse finale vaan de declamatiewedstrijd veur kinder vaan de basissjaol, organisere versjèllende lokaal Veldeke kring hun plaotseleke finale. Zoe ouch in Venlo en Tegele, boevaan de winners noe bekind zien.

FINALE IN VENLO

Vriedaag 31 maart 2017 vónd in de Venlonazaal weer de finale plaats van de Venlose declamatiewedstried. 39 kinder van de basisschoeële oet Venlo en Blierick declameerde eur gedich. Sómmige toepasselik gekleid of oetgedos met attribute veur beej eur gedich. Erg leuk! De zaal waas al op tied bómvol met kinder, elders en opa’s en oma’s D’n aovend woort weer geprissenteerd door Hans Jacobs. Met ‘nen houp joeks en jen reep hae de finaliste met gruupkes van vief de buun op en stelde hae de kinder op eur gemaak, wie weej det van um gewind zien. Nao 19 veurdrachte woort d’r ’n kleine pauze ingelas met ’n prachtig muzikaal optraeje van Kiki Severijns op trompet. Daonao kwame de andere 20 kinder aan de beurt um eur gedich te declamere.

De jury bestónd oet Hay van Hoorn, René Dings en Juul Stokbroekx, alledreej bekind oet ’t theater- en tenielwaereldje. Zeej hebbe genaote en stónde d’r van te kieke waat Venlo ‘nen houp talentjes haet.  ’t Waas ’n zwaore taak, maar d’r zien toch ’n aantal winnaers oet de bus gekómme. Juul Stokbroekx leet de kinder neet langer in spanning en makde d’n oetslaag bekind:

Ónderbouw
1e Pries   Sophie Sassen – Willibrordusschoeël met ’t gedich  ‘’ ’t Nieje kledje’’
2ePpries   Trijntje Nellissen – Willibrordusschoeël met ’t gedich  ‘’Willie de goldvis”
3e Pries   Esmee Peeters – De Koperwiek met ’t gedich  ‘’Waat wils se noow ?’’

Middebouw
1e Pries   Jop Gubbels – De Koperwiek met ’t gedich  ‘’Supermen!’’
2e Pries   Yanna Schreurs – De Koperwiek met ’t gedich  ‘’Logere’’
3e Pries   Donné Lothmann – De Koperwiek met ’t gedich  ‘’ Supermen!

Baovebouw
1e Pries     Fenna Saak – De Koperwiek met ’t gedich  ‘’D’n ierlike vinder’’
2e Pries     Maud Lucker – De Koperwiek met ’t gedich  ‘’Pechdaag’’
3e Pries     Kiki Severijns – St. Martinusschoeël    met ’t gedich  ’’Brr bah’’

De nummers 1 meuge deilneme aan de Limburgse finale op 20 mei 2017 in Dok6 in Panninge. ’t Waas weer ‘ne fantastischen aovend en haopelik doon d’r  ’t volgend jaor nog mier kinder mei.

FINALE IN TEGELE

Wat waas ‘t wir sjoeën op gójje vriedig 14 april in ‘t Zaelke. Met ‘ne zaal vaol met kinger, elders, opa’s, oma’s, juffe, meisters en hiél vuuël anger fans, kóste weej ós laote verrasse door hiel vuuël Tegels talent. Hanneke van der Sommen wis met zien sympathieke presentatie de kinger op eur gemaak te sjtelle, zoeëdet alles soepel verleep.

Ós dialek laef, det waas waal dudelik, maar ouch veel op wie good de kinger zich kóste presentere aan ‘t publiek. Asof ze dageliks oppe buun sjtaon! Gelökkig waas d’r ein kundige jury met ‘n groeët hert vur Tegele, te weite dhr. Jo van der Velden, mevr. Jeanne van der Velden en dhr. Toine Ambaum. Aan eur de ieër, maar ouch de zjwaore taak öm 3 winnaers per bouw te keze. Naodet de jury eur bewóngering had oetgesjpraoke vur de sjoeëne expressie van alle deilnimmers, volgde d’n óetsjlaag:

Óngerbouw:
1. Gijs Broekman met ‘t gedichje “acrobaat” van Leonie van Hulten
2. Frederique Gubbels met “op sjoeël” van Susan Janssen
3. Noud Kessels met “eiketske” van Leonie van Hulten

Middebouw:
1. Anouk Raijer
2. Isa Kessels
3. Isa Hanraets.
Alledreej met ‘t gedichje “bedtiéd” van Linda Hanraets

Baovebouw:
1. Lisa Idink
2. Cielke Willemsen. Allebei met “nae… nae… nae…” van Hanneke v.d. Sommen
3. Bo Schraven met “sjtraof sjriéve” van Herman Bors

De nummers 1 lete eur gedichje nag ens huuëre en zulle det onnag ens doon beej de Limburgse finale, in DOK6 in Panningen op zaoterdig 20 mei 2017.

Weej sjpitsen ós al op de volgende kieër!

← Ga terug