Winners Priesvraog Limburgse taol veur kinder bekind

Eind november vaan veureg jaor woort de Priesvraog Limburgse taol gelanceerd door ’t Hoes veur de Kunste. De opdrach waor: maak creatief en lierzaom materiaol wat de mietaolegheid vaan kinder tösse 0 en 13 jaor stimuleert en bevordert, in samewèrking mèt kinderdaagverblieve of ’t basisoonderwies. De jury is euverweldeg mèt mer leefs 27 aonvraoge. Oet dees aonvraoge zien 4 winners gekoze die hun idee mage verwezeleke mèt de gewonne 12.500 euro. De winners zien venaovend (vriedag 5 miert) um 19.00 oor te gas bij ‘t program Avondgasten vaan L1 TV, wat deze kier gans gewijd is aon de Limburgse taol.

Aonleiing veur dees priesvraog waor de oonderteikening vaan ’t convenant Limburgse taol door de Provincie Limburg en ’t Ministerie vaan Binnelandse Zake en Keuninkrieksrelaties. Zie höbbe aofgesproke um de positie vaan ’t Limburgs te verstevege en ’t gebruuk devaan te bevordere en te stimulere. Ouch laote zie mèt dees aofspraok zien tot zie de Limburgse taol serieus numme es regionaol taol binnen Nederland.

De väöl gooj projekveurstèlle laote zien tot de Limburgers zelf deveur zörge tot eus taol levendeg blijf. De creativiteit en motivatie vaan talrieke Limburgers zörge deveur tot eus taol euvergedrage weurt op de nuiste ginneraties Limburgers.  Zoe behawwe veer same ’t Limburgs en drage veer daoneve bij aon ’n gooj (taol)oontwikkeling vaan eus jäög.

De Jury

De jury vaan de Priesvraog Limburgse taol bestoont oet Christine van Basten-Boddin (naomes Veldeke Limburg), Jeanine Deckers (naomes Vereineging Limburgse Bibliotheke), Alexandra de la Roij (wèrkzaom bij MIK & PIW Gróp), Jos Feron (wèrkzaom bij Movare), Mark van Leersum (wèrkzaom bij de Nuiste Pabo) en oonaofhaankelek juryveurzitter Ruud van  Eeten (naomes ‘t Hoes veur de Kunste Limburg). Zie jureerde de projekte oonder mie op: ’t stimulere vaan ’t gebruuk vaan de Limburgse taol, samewèrking tösse mie partije, geriech zien op deurzaam börging, provinciebreid oet te rolle en touwpasbaar veur kinderopvaankorganisaties en/of basissjaole.

De winners

  • Limburgs kwartèt, door Elke Thijssen & Toussaint Jongen
    Elke en Toussaint kaome mèt ’t idee um e kwartèt te oontwikkele boemèt kinder en jong lui speulenderwijs hunne Limburgse woordsjat vergroete. ’ne Good touwpasbare speulvörm veur ’t primair oonderwies boebij speulend liere veurop steit. Ouch is daobij aondach veur regionaol versjèlle en waardeert de jury ’t enorm tot e klein mertoonderzeuk is oetgeveurd.
  • Limburgse Energizers veur Kids, door Guido Heijnen & Jos Netto
    De energizers vaan Guido en Jos zien ideaal um tösse de lèsse door in te zètte. Zoetot de kinder hun energie kwiet kinne door te bewege in ’t dialek. ’t Out of the Box idee slut good aon bij de belevingswereld vaan kinder en is einvoudeg touwpasbaar in ’t oonderwies.
  • Spraek Limburgs! door Troubadours van de Toekomst
    De Troubadours van de Toekomst, ‘ne groete gróp Limburgse leedsjessjrijvers, wèlle mèt dit projek same mèt kinder vaan de kinderopvaank dialekleedsjes make, oftewel veur en door kinder! De touwvoging vaan nui media, zoewie YouTube en TikTok maak vaan ’t projek ’n eigetijds gehiel. De jury vint ’t e verbindend en creatief projek wat provinciebreid is oet te rolle.
  • De Limbox – trots op mijn taal, door Petra Roël en Bianca Versteeg
    Petra en Bianca zètte in op e breid scala aon lèsacitivteite veur basissjaole. De krach vaan ’t projek is tot ’t e breid mietaoleg karakter heet, wat de mietaolegheid breier trèk es allein de Limburgse taol. Dao is aondach veur ’n doorloupende lierlijn en daomèt good touwpasbaar in de praktijk.
← Ga terug