Workshop van Benny Lindelauf voor sjrijvers Veldeke Verhaole Konkoer

De zes dialeksjrijvers die bekroend zien in ‘t Veldeke Verhaole Konkoer vaan 2015 kraoge vaan Veldeke de gelegenheid mèt te doen aon ‘ne workshop vaan Benny Lindelauf. Ein vaan de deilnummers, John Hertogh oet Sittard sjreef dao-euver ‘t volgende verslaag:

Workshop mit Benny Lindelauf

Els Diederen oet Houthem-St.Gerlach mit Druimtuin, Marleen Schmitz oet Oosjbaek  mit Anne F., Har Sniekers oet Thoor mit  Absoute, John Hertogh oet Zittterd mit Alles is muigelik, Wim Kuipers oet Mestreich mit Film ’t waeges en Koos Neijnens oet Weert mit Vör ’t gevâl det, zeen door de jury van ’t Veldeke Verhaole Konkour 2015 geselecteierd veur eine workshop mit de sjriever Benny Lindelauf  én de publicatie van hun verhaol in ein sjpissiaal bielaag van ’t Veldeke Jaorbouk 2016.

De workshop woort op twee zaoterdigmiddige gehawte in de Bieb van Remunj. NB: Ei paar waeke later zou Benny oppe zelfde plaatsj de Halewijnpries en de Reinaerttrofee van de sjtad Remunj kriege!

Veer woorte allenej wilkóm geheite, mit kaffe en thee, door Veldeke’s vice-voorzitter Lei Heijenrath. Benny haw de zös inzendinge thoes goud bekeke en veurzeen van zien opmirkinge.  Veer hawwe ós verhaole ouch gelaeze en koosjte goud mitdoon en mitdenke. Jederein lous  ei sjtök van zien eige verhaol veur en Benny genaot van de diversiteit van de klanke,  hae vergeleek ’t mit ein orkes! Gouf ós kómplemènte euver ózze sjriefsjtiel en opboew, wodoor hae metein midden in de verhaole haw gezaete. Jaomer dat ós verhaole al vaerdig ware en ouch al bie de drökker louge, angesj hawwe veer zeker zien tips mitgenaome. Veer höbbe daoróm ouch gein tweede verbaeterde versie gesjreve. Benny haw al goud veurbereid en gouf ós fejn wirkvórme. Hae leit ós ein portrètfoto oetkeize, mit ein personagedossier es hoeswerk!. Dao-in sjreve veer wie awd dae minsj waar, waaferein karaktereigensjappe hae/zie haw, welke gewènde, welke angste, wo hae/ze ’t leifs woonde enz.. Zo woort de houfpersoon tot laeve gebrach.

Oppe tweede biejeinkóms krege veer d’n opdrach óm de besjreve man/vrou te vergelieke mit ein categorie oet ein metafore-lies. Veurbeeld: es hae/zie sjpeelgoud waar, dan waar hae/zie ein….. rood  houtere loupfitstke. En die metafoor woort dan gebroek in eine korte ómsjrieving. De sjoonste combinaties woorte gevónje. Veer louze ouch allenej ein door Benny aangebaoje sjtökske euver de gebäörte, wo bie veer mouste lètte op de locatie, ’t waer, tiedsjtip en ómsjtenjesj die besjreve woorte. Óm de eesjte versie van ‘t verhaol euver de gebäörte van oze man/vrou te sjrieve, maakde veer ein woordsjpin. ’t Begin van die gebäörteverhaole woort veurgelaeze en door ós besjpraoke. De oetwirking van dat verhaol mochte veer nao Benny opsjikke en degein die dat gedaon höbbe krege ziene sjriftelike feedback!

Veer höbbe allenej genaote. Benny nog ’t meis, denk ich. Hae kent neit allein goud sjrieve en les gaeve, mer baovenal emes insjpireiere. Veer höbbe ‘ne houp van häöm geleerd. ’t Ware intressante, leerzame en gezèllige middige. Benny, names alle deilnummesj, nog èns : gans väöl dank!

© John Hertogh, Zittesj.

← Ga terug