Zjubelei-oetgaof “Limburg op z’n lekkerst”

Wil en Netty Engels Geurts höbbe in de loup vaan veerteg jaor veerteg beuk oetgebrach mèt recepte en oetlègk euver eettradities oet Limburg.  ’t Echpaar oet Thull is daobij altied trouw gebleve aon de eige Limburgse wortels en heet ziene kinnes dao-euver ummertouw verdeep en verbreid. Zjus twinteg jao geleie versjeen “Limburg op z’n lekkerst” veur ’t iers bij oetgeverij TIC. ’t Book beleefde drök nao drök. De lèste, d’n achste, versjeen al weer versjeie jaore geleie.

De vraog is of de Limburgse keuke nog floreert. Ummer mie fusion restaurants, nui keukes en menere vaan ete en levesstijle zouwe wel ins ’n bedreiging veur de traditioneel Limburgse keuke kinne zien. Kiek ouch nao ’t trökloupend aontal werm bekkers mèt typisch broed en bankèt oet de buurt. Limburg op z’n lekkerst bringk in eder geval de aw recepte weer oonder de lui. Tied dus veur ‘n nui verpakking en herzenen inhaajd, aongevöld mèt väöl mie en nui foto’s vaan hoesfotograaf en vörmgever vaan ’t book Luiz Oliveira.

Op vriedag 21 september is ’t zoe wied. In Bookhandel Dominicanen in Mestreech zal daan um 16.00 oor ‘n gratis touwgaankeleke demonstratie weure gegeve door Wil en Netty. Um 19.30 oor begint ‘nen speciaolen aovend veur genudegde, gewijd aon de nuiste oetgaof vaan oetgeverij TIC en de veertegste vaan ’t echpaar Geurts-Engels. Daobij zalle Limburgse hepkes en drenkskes geserveerd weure en zoewel e muzikaal es literair program weure gebooje.

Dat weurt ‘ne geweldege en gezèllegen aovend dee vriedag 21 september. Bookhandel Dominicanen deit dao speciaol de deure veur ope. Auteurs, illuustratore, vörmgevers, fotografe, muzikante, bookhandelere, journaliste, recensente en cultuurminnende Limburgers zalle daan acte de présence geve. De gouverneur zal ’t ierste exemplaar in oontvaangs numme.

’t Book Limburg op zijn lekkerst is te koup veur d’n actiepries vaan € 14,90. Nao 1 december 2018 zal de pries € 19,90 zien.

← Ga terug