21 Fibberwarie: Internationaolen Daag vaan de Moojertaol

Op donderdag 21 fibberwarie 2019 is ’t weer de jaorleksen Daag vaan de Moojertaol. Deen daag is door de Unesco oetgerope um aondach te vraoge veur de 6000 taole die wereldwied nog gesproke weure meh boevaan bekans de helf bedreig weurt door oetsterve. Zoe erg is ’t gelökkeg mèt eus Limburgs nog neet gestèld meh ’t is good um debij stèl te stoon tot ’n taol neet vaanzelf blijf bestoon. Es in ‘n taol neet actief gesproke en gesjreve weurt, besteit de kans tot ze laankzaam verdwijnt. En es ’n taol neet in ’t oonderwies gelierd weurt aon de kinder, is ’t extra lèsteg um te zörge veur ‘t behaajd devaan.

Boerum is ’t belaankriek tot ’n taol en dus ouch eus Limburgse taol blijf bestoon? De Unesco gief aon tot ’n taol ’t mies krachtege instrumint is um eus materieel en immaterieel erfgood te behawwe en te oontwikkele. Mèt ander wäörd: de taol gief us touwgaank tot wat in ’t verleie gesjreve en gesproke, gezoonge en gedeclameerd is. Es veer die taol neet mie begriepe geit alles wat eus veurgengers in die taol höbbe gezag veur altied verlore. En veer geve alles wat veer in die taol sjrieve of opnumme door aon eus kinder en kleinkinder. Zoe tot ze euver hoonderd jaor nog kinne naogoon wie veer noe vastelaovend viere, um mer ‘ns get te neume.

Veldeke heet verleie jaor in 2018 alles draon gedoon um d’n Daag vaan de Moojertaol op de Limburgsen agenda te zètte. In samewèrking met de gezèt De Limburger höbbe veer deveur gezörg tot in 8 edities vaan die gezet ’n artikel vaan Guus Urlings euver eus moojertaol in 8 versjèllende dialekte te lezen waor. En umtotste ’n taol eigelek ouch moos kinne beluustere, höbbe veer die tekste ouch nog ‘ns ingesproke zoetot ze te beluustere zien. Luuster mer ‘ns wie riek eus Limburgs is in de spraok vaan Venraoj, Venlo, Weert, Remund, Sittard, Mestreech, Lemiers en Kerkraoj.