Keuning kump get breakvaste
Gojemörge. Ich höb al bao viefhóngerd wäörd euver ‘ontbijt’ gesjreve en nag get hónger. Ich weit aevel neet wo ich noe goesting in höb. Lidioom geit euver bezunjer wäörd, mae meis euver wäörd die d’r al zien, die (dökker) gebroek waere. Ei waord wie vreugvraet, kan me dao get mit? Nou ja: hiej sjteit ’t al. Mae kan det mit literair fetsoen in ei gedich? Tuurlik: in gedichter kan bao alles. Lidioom? Dök neet.
Hiej loup ich vas. Nuuj wäörd máke is ei sjpeel sónger regels. ’t Kan biej die Lust am Tekst heure – mót ich nag väöl euver sjrieve. Euver? Nou ja, wen anger luuj det mit plezeer laeze, waat dan? Ich mein: wen ’t EK foetballe doorgegange woor, en veer wore gewónne (veer zagte zoeget), dan woor ’t krakkemikkigste sjtök euver de finale nag mit plezeer gelaeze.
Neet veur de taal… Klop. Aete duit me onneet veur de taal.
Allei, ’t waert tied veur mier citate (aanhaolinge? Dit geit neet euver kittens) oet de lies Limburgse wäörd veur ‘ontbijt’. Miel van Montfort: Haetj biej oos geine naam. weer aete sjmörges ein botterham. En drinke ein tas koffie en laeze de gezät…
Jack Jacobs: Haet biej os och geine naam. Tas koffie. ‘n Sjmauer oppe voes en nao sjaol.
Hiej belanje veer – ja wo? Zól emes aan de Leidse universiteit zich oets aafgevraog höbbe: woveur haet ’t Nederlandjs gein waord veur Limburgs daverwaat? Woveur wore Ingelse diek viefhóngerd jaor haer neet mie ketent mit ’t waord morgenmete (mörgesaete) en begóste inkel luuj van Veldeke Oxford mit breakfast. Det waord beteikentj get wie: ‘t (ver)braeke van de vastentied, d’n tied van nieks aete wiel me vas sjleep.
Haet ’t zin dit noe nag te melje? Zól me euver dartig jaor ei gek waord zoe verklaore: ’t aafvaege van ’t handjvat van winkelwaegeskes in de maondje det d’r ei vires róndjdabde? Dink aan swaffelen (Lidioom 049). Ach ja. Ich óntbeet ei keteer geleje mit ein gooj zin: Ze zote nag aan de mörgeskóffie wie de keuning aanbelde.
Reagere? redactie@veldeke.net of veldgewas@home.nl
Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringe zien trök te leze in eus arsjief.