Algemein Lede Vergadering Veldeke Limburg bijein in Remund

Veur ’t iers sinds langen tied kóste de vertegenwoordegers vaan de lokaal Veldekekring weer ins in persoen bijein koume in plaots vaan via ’t computersjerm te mote vergadere. De haafjaorlekse Algemein Lede Vergadering voont deze kier plaots in de Oranjerie in Remund. ’t Waor ’n bezunder vergadering umtot in eine kier aofsjeid woort genome vaan Christine van Basten, die de aofgeloupe 4 jaor es veurzitter heet gefunctioneerd, en tegeliek ‘ne nuie veurzitter woort beneump in de persoen van Reg van Loo. De vergadering toende ziech verhäög tot zoe gaw ‘ne goojen opvolger veur Christine kós weure aongestèld. Veur e verslaag vaan d’n euverdrach kint geer terech op deze pagina.

Meh veurtot ’t zoe wied waor móste iers nog get pliechpleginge vervöld weure, zoewie ’t good käöre vaan ’t Jaorverslaag en vaan ‘t Financiëel verslaag vaan de penningmeister es ouch dat vaan de Kascontrolekemissie, boenao ’t bestuur décharge kós weure verliend. Wijer bekrachtegde de vergadering ’t ierelidmaotsjap vaan Nico Kempeners vaanwege zien jaorelang verdeenste as bestuurslid vaan de Veldekekrink Mestreech.

Discussie euver Statute

Daonao woort aordeg get tied ingeruimd veur ’n discussie euver ’t veurstèl veur nui Statute. Die waore nudeg gewore door veranderinge in de wètgeving meh ’t bestuur had die gelegenheid aongegrepe um ouch nog get ander zake anders te regele. En dat veel neet metein in de smaak vaan e paar kring. De discussie göng mèt naome euver de meneer boe-op ’t stumrech vaan de kring geregeld waor en wie daobij rekening zouw weure gehawwe mèt versjèlle in gruutde tösse de kring. De hölp vaan getuige deskundege professor Jos Hamers waor ingerope um dao-in get klaorheid te bringe, meh de vergadering kós neet tot e besluut koume. En wat deit me daan? Daan weurt ’n commissie beneump die dat allemaol nog ins good geit oetzeuke. Weurt vervolg.

Wijer maakde versjèllende kring gebruuk vaan de meugelekheid um hun planne en program veur de koumende tied te prizzentere. Noe corona (veurluipeg) ziene langsten tied gehad liekent te höbbe, kinne eindelek weer activiteite georganiseerd weure veur de lede en dee kans laote de kring zien neet oontgoon. Binnekort zal ouch d’n agenda op deze website daan weer gevöld weure mèt wat links en rechts in de provincie te doen is aon Veldeke activiteite. Ein vaan die activiteite die noe al wel vas steit is de Kontakdaag vaan alle Veldekekring dee dit jaor nao twie kier te zien oetgestèld vaanwege corona eindelek kint plaotsvinde in september in Remund.

← Ga terug