Groet Mestreechs Dictee: Egidius Cratsborn weer neet te versloon

Egidius Cratsborn is veur d’n derde kier achterein de winner gewore vaan ’t Groet Mestreechs Dictee, wat op zoondag 2 aprèl gehawwe woort in ’t Centre Céramique. Heer maakde mer 9 foute. De nómmers 2 en 3, Patricia Paulussen en Gaby Gerritsen maakde allebei 20 foute. Vaan de gróppe scoorde “Vrun vaan Kaffee eus Mestreech” ’t bèste. Per persoen woorte gemiddeld 56 foute gemaak in ’t dictee. Alles bijein naome 104 persoene deil aon ’t dictee, boe-oonder wèthawwers André Willems, Jim Janssen en Lars Flinkerbusch, directeur vaan Mestreech Marketing.

Gouverneur es tekssjrijver

D’n teks vaan dees veertiende editie vaan ’t Groet Mestreechs Dictee woort gesjreve door niemes minder es gouverneur Theo Bovens. Heer leet ziech inspirere door ’t Nederlandstaoleg tèllevisieprogram “Heel Holland bakt”. ’t Dictee had daan ouch es titel: “Gans Limbörg bak”. Deilnummers woort ’t vuur aon de sjene gelag umtot ze alderhand provinciaol delicatesse, broedsoorte en baksels korrek móste opsjrieve.

Instinkers

Netuurlek waore dao ouch e paar “instinkers” bij um deveur te zörge tot ’t “versjèl gemaak” kós weure. Veurbeelde vaan Mestreechse wäörd boebij väöl deilnummers de fout in gónge zien ‘molberevlaoj’, ‘speebagk’, ‘tets’, ‘zelvers’ en “Limbörg”. Zelf doog Theo Bovens versjeie kiere mèt aon ’t Groet Mestreechs dictee en wónt zelfs e paar kier de grópspries mèt de gróppe ‘Femilie Bovens’ en ‘De Kapitein vaan Köpenick’.

Veur spek en boene

Neve de 86 fanatieke deilnummers, sjreve dit jaor 18 enthousiaste persoene ’t dictee ‘veur spek en boene’ mèt. Ze koume deveur oet ’t Mestreechs neet zoe good te beheerse um mèt te kinne dinge nao de prijze. Zie kóste nao aofloup hun dictee zelf corrigere aon de hand vaan d’n officiëlen dicteeteks. Opvallend is tot ’t aontal deilnummers veur ‘spek en boene’  eder jaor lieger weurt in vergelieking mèt veurege edities. Ummer mie lui dörve officieel deil te numme aon ’t Groet Mestreechs Dictee.