Lidioom: Plezeer veur laezers en sjrievers

Lidioom dus. ’t Belangriekste zien (de) biejzunjer Limburgse wäörd. Hiej kump eine kleine gas: drei bein, drinkes, wientemper, sjoeverechtig, alik, achteropsjöt. Opvallende Limburgse wäörd mae waat mótte veer daomit? Sjtrónse? Helpe ze biej ‘t Groot Limburgs Diktee? Angers gezag: waat wil ich mit mien sjtökskes euver ’t bezunjere van ’t Limburgs?

Laot ich det zoe zegke: de prach en krach van Oos Taal tuine, zoedet de miense dao (weer) plezeer aan kriege – die Lust am Text waert det dökker geneump. Plezeer veur laezers, mae zeer zeker veur sjrievers biej ’t sjrieve of zeuke nao wäörd. Wach efkes: ‘t is dus veural eine cursus (good) sjrieve?

Nae en ei bietje jao. Lidioom kan me zeen es ein verzameling materiaal, veural wäörd, mae aaf en toe ouch suggesties, ideje en veurbeeldje. Die zien meis bedoeld veur sjrievers die laevetiger, sjpannender Limburgs wille gaon sjrieve; Limburgs det me mit plezeer leus.

Hiejmit is Lidioom nag geine cursus ‘baeter sjrieve’, dae dich get liert euver de plot, pittige dialoge verzinne, wie me zörg det die nuuj vrouw waal doug, of ’t leid van de obbernuuj bedraoge joetsmedam mitgeveuld kan waere. Nae: Lidioom vreug belaef aandach veur (alweer) prachtig Limburgs, det dich pak, wo me versjlaaf aan kan rake, hoteldebotel verleef op waert.

Taal, taal en wäörd: neet WAAT gezag waert mae WIE. Waordkuns. Sjiljere mit wäörd, heurt me dökker. Zeuk uch ’t meisterwirk van de sjlaopkamer van Van Gogh in Arles op, kiek dan waat de muibelnaering uch in de bös duujt: waem haet de sjoenste kamer? ’t Waord sjoen is gevalle. Dao wil ich wiejer nieks euver zegke, dan belanje v’r in de zómp van de esthetica ofwaal schoonheidsleer. Ich mein: went geer die kamer van v. Gogh zeet, dinkt geer ierder aan gedichter es aan veursjrifte van de gemendje – haop ich. Neet aan de wachkamer van de sociale deens mae aan ein vakwirkboerderie wo de persessie naeve trek, mit blome, bruutjes en de meziek van de hermenie van zegk-ich-neet die Mozart sjpeelt.

Reagere? Sjrief nao redactie@veldeke.net

 

 

Dit is Lidioom nómmer 2. Es geer de ierste aoflievering vaan Lidioom wèlt trökleze kint geer hei klikke.

 

 

 

← Ga terug