Mestreechs Taolpanel vaan start

’t Taolpanel is e platform, bedoeld um oetgebreid dialekoonderzeuk te doen nao ’t Mestreechs. Door alle meugelekhede die ’t internèt us beejt, is ’t tegenwoordeg meugelek um op ’n betrèkkelek einvoudege meneer ‘ne groete gróp lui te bevraoge euver versjèllende oonderwerpe. Bekinde veurbeelde vaan zoe platform zien ’t EenVandaag-Opiniepanel vaan ’t gelieknaomege nuitsprogram of ’t opiniepanel vaan Maurice de Hond.

’t Taolpanel is neet zoezier bedoeld es ’n opiniepanel – wat vinde de lui vaan e bepaold oonderwerp? – meh es instrumint um structureel taolwetensjappelek oonderzeuk te kinne doen nao ’t Mestreechs in de mies breie zin, zoewie ’t huidege gebruuk, de oontwikkeling, taolvariatie, taolverandering of ’t besjrieve vaan de veurraod aon wäörd en de grammatica.

’t Taolpanel besteit oet panellede. Ederein kint lid weure en op die meneer bijdrage. ’t Doel is um ‘ne  zoe groet meugeleke gróp lui te verzamele. Wie groeter de gróp, wie betrouwbaarder de data. Aonmelle kint via de website www.taolpanel.nl

De wetensjap heet ’t Limburgs dialek noe wel good oontdèk want dit is al ’t derde wetensjappelek initiatief binne e paar daog : neve ’t Taolpanel is dao ouch nog e Limburgs toetsebord in oontwikkeling (zuug hei veur ’n ieder beriech dao-euver) en weurt binnekort ouch nog ‘nen dialek-app veur ’t Eijsdes en ’t Mestreechs geprizzenteerd boe-op me wäörd en zinne in die twie dialekte kint inspreke en aofluustere.