Veldeke kringendaag 2019 in Oud-Valkeberg

Op ‘ne hièl zonnige lètste daag van augustus, de 31ste, reisde bekans alle krinkbesjture van Veldeke nao Oud-Valkeberg. In dat dörpke zou de jaorlikse kringedaag 2019 plaatsvinge.

Allerièrsj woort begoes mèt ’n tas koffie/thee mèt ’n lekker sjtök lödderkesvla in hotel ’t Valkennest. De wèthouwer van economie, toerisme en financië van de gemeinte Valkenburg a/d Geul, Claudia Bisschops, eupende d’n daag mèt ’n pleidooi veur ’t Limburgs dialek. Zie belaofde zelfs dat zie 10 man bie-ein zou verzamele um ‘ne cursus dialek te komme volge um fatsoenlik te kènne facebooke in ’t plat. Die toesjpraok kènt geer op dees website leze. (link)

Daonao woort de provinciale weeg euvergesjtoke veur ’n lezing in ’t St. Janskèrkske, gegeve door historicus Henk Kwakkernaat oet Valkeberg. Hae lag, aan de hand van beelde oet, wie de verhoudinge liegke en höbbe gelege van Oud-Valkeberg tot Valkeberg en woarum in Oud-Valkeberg twiè kesjtièle vlak bie-ein liegke.

Vervolgens besjting ’t programma oet ‘n bezeuk aan de kesjtièl-heemtuin en watermeule van Schaloen o.l.v. IVN-gids Jef Boosten. Wiejer woort ouch kesjtièl Genhoes bezeuk. In ’t kesjtièl woorte veer ontvange door de bewonersj: de kunssjilder Leendert van Dijk en zien echtgenote Rita. Zie verzörgde ‘n rondleiding door ’t geboew, woabie v’r tegeliek ‘n groat aantal sjilderieje van häöm koeste bewondere.

De miedig woort aafgeslote mèt ’n diner/buffèt in Hotel Op de Beek in Sjin-op-Geul.
De volgende kringedaag vingk plaats in Remung op 12 september 2020.

Els Lahey-Diederen

Ein deil vaan de Veldeke bestuurders op de brögk bij kestiel Genhoes.