Veldgewas geit wijer

Good nuits veur de leefhöbbers vaan de Limburgse taol. Veldgewas geit wijer. Binnekort versjijnt aoflievering 611, bekans veer maond nao de veurege. Eve verdudeleke. Veldgewas is ’n oonregelmaoteg online magazine mèt literatuur, veural gediechte, in de Limburgse taol. ’t Besteit vaanaof jannewarie 2011. Initiatiefnummer en samestèller is Wim Kuipers (82). Haaf augustus maakde heer woersjijnelek ’n fout, mèt es gevolg tot de mailadresse vaan de ruim twiehoonderd abonnees verdwene zien. Ze zien mesjiens nog wel te achterhole, zeet heer, meh dao wèlt heer neet op wachte.

Veldgewas moot wijer. Ouch umtot de reeks Platbook (zuug daoveur hei) verdwijnt. Diechters en sjrijvers in ’t Limburgs höbbe noe bekans gein meugelekheid mie um hun werk te publicere. Ouch daorum verhuis Veldgewas nao de website vaan Veldeke. Dao-op stoon al hoonderde gediechte die sinds 2011 via Veldgewas gepubliceerd zien. Geer kint die hei bekieke.

Nui rubriek: Lienletjes

Meh dat is neet alles. Binne Veldgewas versjijnt ’n nui rubriek die de naom Lienletjes heet gekrege. ‘n “Lienlet” is (waor?) in ’t dialek vaan Neel (Maasniel) ’n lat um käöreg rechte lijnsjes te trèkke, ‘ne liniaal dus.

Die Lienletjers höbbe ’n twiedeileg doel. Op de ierste plaots, en de naom zeet ’t al, ‘n bijdrage te lievere aon ’t oonderwies in de Limburgse taol. Neet op ’n sjaolse meneer meh veurliechtend, oonthullend mesjiens. Journaliste, tèllevisiemakers en prizzentatore, ouch lierare in d’n diaspora, wete verrèk wieneg vaan wat ’t Limburgs noe perceis is. Kuipers wèlt wijer ’t bezundere en waardevolle vaan ’t Limburgs laote zien, ouch es stimulans um in die taol te goon (jonger lui veural) of te blieve sjrieve. ’n Taol die allein mer gesproke weurt vervlak en verdwijnt oeteindelek.

Abonnemint?

Zjus wie iers kint geer uuch nog altied abonnere op Veldgewas. Daan krijg geer ederskier es ’n nui aoflievering vaan ’t magazine versjijnte e mailke touwgesjik mèt ‘ne link nao de website. Aajd abonnees die neet wèlle wachte totdat ’t verlore gegaange adresbestand eventueel weurt trökgevoonde, weure opgerope ziech obbenuits op te geve. Abonnere kint door e mailje sjikke nao redactie@veldeke.net oonder vermellling vaan “Abonnemint Veldgewas”.